去西九龍海濱長廊由黃昏到半夜，海風同維港無敵境伴住睇臺灣「春浪音樂節」，開心！有我最愛嘅方大同，加上蕭敬騰、陳綺貞、張震嶽、MC Hotdog及家家等，由黃昏唱到夜晩！個場好有氣氛，個個海灘look，脚踏草地，飲住凍啤酒，一邊睇一邊跳，就算唔識d歌，有時又突然落雨，大家都依然情緒高漲，絕對值回票價！
入場嘅人個個都抱住祥和之心，有規有矩，開開心心，而大家離開嘅時候，亦會清理自己嘅垃圾，全部都係有質素嘅人！而今日最大嘅見證，係我依然「人老心不老」呀！哈哈。。。下次「春浪」再見！
睇咗「森美要滾」，可能因為係第一場，演出未夠smooth，不過當中嘅“Bird Bird Lane”,“俹簁”同“死八婆”嘅幾段真係好好笑，好抵死。。。可能今次講嘅內容有d散，我會鍾意上次talk show多d。。。無論如何，我會繼續愛森美！
我期待超過一年，部署訂飛超過半年 嘅舞台劇「小人國 4」 ，今晚終於可以同幾個永遠年青嘅大朋友同2個成熟細路一切睇！開心！
「小人國」係一套反映香港文化嘅賤賤格格喜劇，每次都會用一d抵死嘅角度，誇張形體同到肉對白，表達當時當刻嘅香港文化氣息。此劇由多個小單元組成，內裡有部份鮮明角式每個season都會出場，因為熟識佢哋嘅性格，一出場就會令觀眾特別興奮！而今次玩「孤星淚」嘅歌，同教授「辦公室卸膊操」都好攪笑，而皇牌「馮陳美嬋 vs 基米高」另加王菀之嘅「王伯」，真係笑死人無命賠呀！而各男演員反串真係妖到爆，當中我最鍾意粗壯「白只」所扮演嘅Heidi，梳住負離子長髮，著住露胸露臍bling bling長裙。。。嘩，真係超攪笑！
雖然今日落雨落到癲，又急又趕又濕哂，不過睇完li個劇，心情變得開心又興奮，連雨都停咗，突然感覺世界都變得美好。。。噢，但係我又要再開始期待「小人國 5」嘅日子喇～！哈哈。。。
之前一直諗「中英劇團」會如何處理「雨果」嘅經典故事「孤星淚」，故事同演員水準都唔駛多講，肯定有保證，只係佢哋會用mug嘢手法呢？有限嘅人力物力，當然無法做到偉大場面，亦無法花費高昂歌曲版權以歌舞版展示，最後竟然係用「貧窮劇場」形式表演！一切台上工作都由演員負責，又要轉境，又要一人分飾多角，頌要現場奏樂。我睇唔到邊個有份演奏，亦可惜場刊亦沒有列出。舞台特別，同服飾亦非常配合，我對此劇嘅整體表現都很滿意。
「Les Miserables」意思係「悲慘世界」，那個世代嘅悲慘比較簡單，主要係有無温飽同顧慮自身安危，咁我哋呢？雖然我哋享受到比前人更好嘅衣食住行，而且肉身尚算自由，但精神同思想卻又總係永遠身不由己，劇中人要出賣勞力出賣身體，現代人卻要出賣自尊出賣思想，百般無奈。。。或許我哋只係演繹住另一世代嘅「Les Miserables」
睇完《找個人和我上火星》，完全失望！！
買飛嘅原因，此Re-run劇係「莊梅岩」得獎作品，曾奪第十四屆香港舞台劇獎「最佳劇本獎」及「十大最受歡迎劇目」，而演員當中，一個攞過最佳男主角，兩個女演員攞過最佳女主角。。。。牌面真係好吸引，可惜感覺很差，想盡方法叫自己將就一下比比面，但真係唔得！
最大問題係演員，「業餘」感太嚴重，又唔感動，又唔抵死，又唔生動。。。當中只覺「區嘉雯」係做到角式要求，其他都唔夠水準，而當中最唔掂就係男主角「何偉龍」，佢執迷佢自己嘅外形，完全失控嘅龐大身軀，吃力嘅動態，連說對白都欠流暢，全無「劇味」可言，我唔會質疑佢對戲劇嘅熱情，但可能真係「不許人間見白頭」，何先生真係唔應該再舞台！或許你會覺得我良薄，但佢嘅演出真係好趕客。。。我會諗，如果li個角式由秋生做，再配番幾個專業d嘅演員，成個戲應該好睇好多。
一連兩日同女兒不停睇Les Misérables，不停聽佢嘅Soundtracks同研究歌詞，就算第二日即時重睇，竟然覺得比第一次睇更加好睇，可能唔需要去留意劇情，反而可以更加欣賞音樂，唱腔同演技。。。。睇完有份感動，唔係比個劇情，而係知道全部現場唱做，唔係後期咪咀，只係管弦樂部份係指揮家睇住條片拼番落去，超勁！個個演員唔係歌星，但係勁唱得！Amanda嘅高音，完全不費吹灰之力就輕易唱出海豚音，而 Anne利害嘅演技唱住I dreamed a dream, 真係睇到我好心痛，佢攞Oscar真係實至名歸！此戲唯一缺點係發現結尾有「穿賓」位，你睇唔睇到？點解唔可以用電腦移除呢？
現期待月尾睇港版Les Misérables舞台劇，亦希望自己唱得到 I dreamed a dream啦！
雖然你已經離開10年，此刻獨自看著為你辦嘅記念音樂會，依然好心痛，依然眼濕濕。Leslie, I miss you much!
