三角關係《廢坑的黃色笑話之條鐵是這樣煉成的》

上星期擔心有流血衝突，最終「政壇奇蹟日」由悲轉笑，真心覺得劇情比周星星電影好笑！今晚睇三角關係《廢坑的黃色笑話之條鐵是這樣煉成的》，係諗住笑一餐，但結果就由笑轉哀，睇到尾段及至此刻，眼淚尚在微微滾動！去年秋天的79日，令劇團用心（我相信亦用淚）加上對香港嘅愛寫成此劇，有深情喻意，用咗好好嘅比喻方法說著香港當下的真真假假與及人和事，雖然用咗一些攪笑手法演出，但我實際感覺反而係悲傷有淚，最大感觸係那句「雖然失望，但不要絕望！」

無論你對那79天的定價如何，只要係香港人，睇此劇都應該會有所感悟，別錯過！

************************

**官方介紹**

我同你地係唔同嘅！

我少去金鐘，唔知催淚彈咩嘢味道，露營都未試過，更加唔會瞓街啦！ 你地班友成日叫人罷睇cctvb，但係我老母晚晚唔追膠劇就瞓唔著㗎，我唔陪佢睇真係好不孝；早排見班學生喺牆上面貼滿晒五顏六色嘅便條紙，我覺得好唔環保囉，聽講重話有個咩街邊自修室，係咪乘機去拍拖玩唔返屋企咋？細路，中學生不應談戀愛呀！

我知，我講野好多人都唔啱聽，咁你咪照樣unfriend我囉，不過我連facebook都無喎。政治嘅野，關我遮事咩！ 不過好彩，家陣條路通番，啲車塞番，警察光明番，社會和諧番，生活正常番。咁就最好啦，係咪?

故事從一間多人合租的天台劏房開始。因為一件突發的社會跌橙事件，令這裡本來安排好的休息秩序產生了混亂，透過不同背景年齡性別的租客碰面、嗌交、談心、唱遊等不同表演形式，呈現七十九天後香港人的正常生活。

本節目可能含不雅用語、潮語、男扮女易服癖、暗角見鬼恐佈場面、警民關係冷笑話、政治內容等等等等，不適合沒有幽默感人士觀看，敬請留意。