三角關係「勁歌金曲2～誰比你重要」

睇“三角關係”嘅「勁歌金曲2～誰比你重要」尾場，用多首金曲串連作對白同說故事，算是對廣東流行曲作致敬。清新簡約有格調嘅場景/服飾配合好有feel嘅音樂/燈光，將一個女人兩段情，以03年沙士一段另加上約85年開始嘅一段，兩個時空同台交替。。。一首首張國榮唱嘅歌，一段段佢嘅讀白，或者係劇場音效太好，我真係覺得「哥哥」响現場唱，又攪到我有d眼濕濕。雖然「哥哥」已經離開10年，每到li段日子，總會有心痛嘅感覺。「。。。願意今生約定，他生再擁抱！」有時一些人一些事，唔會因為時間過去而淡忘，每次再聽到一d音樂，見到一件物品，你又會記起前塵往事。。。而故事中嘅女主角，令我想起日本翻譯小說「藍，或另一種藍」，就係講無論點去選擇，最終每個選擇都總會有欠缺有遺憾。。。此劇將會於9月re-run，喜歡舊有情懷嘅你，就唔好錯過喇！

舞台劇「我和春天有個約會」

「你你你為了愛情，今宵不冷靜。。。你你你為了愛情，孤單的看星。。。」今晚終於完了一個心願一個情意結，去睇咗舞台版「我和春天有個約會」。我已睇過電影版N次，熟到差d可以自己做一次出黎，每次睇，每次都會繼續被感動，今晚聽到嗰句「我係鳳萍個仔。。。」，我又再眼濕濕。我依然覺得li個劇始終係本土創作嘅經典，有舊日情懷，好睇易睇亦令人感動。而所有特別創作嘅曲詞，亦非常好聽，「。。。若是情未冷，始終相信，我倆與春天有個約會，I have a date with Spring!」可惜劉雅麗完全唔夠氣亦勁聲沙，已經唱唔出以往嘅歌聲，我絕對覺得自己唱得比佢好！（唔信就約我去KTV等我唱li兩首飲歌比你聽啦！哈哈。。。）

香港藝術節「屠龍記」

睇香港藝術節的「屠龍記」，有好喜歡嘅演員，而我最恨睇嘅原因，係因為此劇由黃詠詩編寫，亦係佢碩士畢業作品。佢每次嘅劇本都有內在意義或意想不到，同我常睇嘅翻譯劇本有得fight，甚或更有本土式感染力！今次亦唔例外，故事簡單，講兩個戲劇界工作者持不同立場，訴諸法律。。。由激動，自信，自持。。。到無力爭，要放棄，嘗試體諒。。。全劇只有4個演員，一張長枱，4張椅，但用咗豐富流暢嘅對白去說故事。無太多誇張動作表情去比我觀能刺激，但對白句句入肉，精彩！沒有編者嘅功夫，好難會咁好睇！

 我覺得此劇嘅深層意義，似乎係想話比你知，無論何時何地，每個人都會有其自身立場，好難講誰對誰錯，邊個可以給與絕對標準呢？所以下次當你覺得別人做錯嘅時候，試下跳出自己嘅標準，跳去對方嘅立場睇下，多一分諒解，少一分激動。咁樣做未必令你改變立場，我亦認為唔需要，但最少唔需要亂將自己嘅情緒份過牽動罷！

風車草劇團「BENT 屈獄情」

今日睇風車草嘅「BENT 屈獄情」，講一段有關納粹德軍殘害同性戀嘅故事，內容好heavy，好沈鬱。。。雖然我唔太喜歡li個故事，但主角們於劇中感情嘅投入，我好敬佩亦好欣賞。而全劇亮點，係張敬軒男扮女嘅15分鐘戲，好靚嘅露腿造型，憂思哋唱住“Street of Belin”。。。。加上更成熟嘅演技，好吸引呢！而謝幕時收到「靚女」張敬軒送比我嘅飛吻，更冧呢！
或許我太投入欣賞舞台劇，心情真係被劇情牽動到，有d低落，或者真係要睇番d癲癲哋嘅劇平衡一下心理。

雙簧管樂團音樂會 "尋 - 迷"

今晚聽“管樂雅集”Oboe演奏會，由女兒嘅師傅，師公，師叔。。。演出，要好好享受！