鄧樹榮戲劇工作室《打轉教室 DETENTION》

真正2012年最後睇嘅一場舞台表演《打轉教室》，零對白，全動作喜劇！精彩！此劇適合8-80歲睇，集合各有專長嘅演員，有「包山后」蜘蛛女，有自由體操運動員，有粵劇學生，有鼓手。。。全部運用肢體在一個課室內說故事，好好玩，真係非常攪笑！睇得個個都大聲笑同好開心！導演有心，希望將香港製作帶到全世界，希望不同種族人士都可以欣賞，希望能夠成為香港本土長壽演出！真係好值得支持！

***************
《打轉教室》鄧樹榮戲劇工作室
**官方介紹**

香港式幽默不再止於語言！

《打轉教室》將你我再三回味的中學生活，如互相整蠱、認叻吹牛及追女仔等，以幽默、抵死的形體動作重新演繹, 足以令觀眾笑至人仰馬翻。更以超高難度後空翻、功夫對打、敲擊及唱無歌詞情歌等灌穿全劇，還有老師（「包山后」鄭麗莎飾演）因要加班及男友爽約後不勝壓力而做出的有違常理舉動；實在令人笑至不能自拔。

舞台劇《上司已死》

《上司已死》 創典舞台x白只

喪笑辦公室喜劇(Humana Festival of New American Plays 參節作品)

上司一死 ,下屬崛起!...

有一天，你如常地回到辦公室，突然發覺你的上司死了，你會：
A　痛哭流涕　　B　欣喜若狂　　C　若無其事，坐他位置

當你發覺同時有兩個同事在覬覦這個位置時，你又會：
A　明刀明槍　　B　拱手讓人　　C　越級向老闆告狀

一個容乜易笑死上司的戰爭故事

*************************************************
我2012年最後睇的一個小劇場SHOW, 是個翻譯劇, 故事大綱幾吸引, 或者就係打工仔心態, 想從中得到共鳴或者一d上位方法! 哈哈.... 當然不能以大製作大CAST去批評, 不過始終覺得小品黎講依然有點欠缺! 可能是 “白只”做導演, 劇中好多表現方式, 都充滿住“白只”嘅風格, 只可惜演員有時catch唔到個beat, 硬係有D接得唔順嘅感覺! 我覺得其中一個主要演員”泥九”實在太差, 台詞說不清楚, 演出也太業餘!!

睇完此劇, 發現有時現實都一樣, 你嘅上司有時真係唔係醒, 但你永遠唔知點解佢會”騎住你”…… 不過我覺得我已經算好彩, 人生中暫時只曾遇到一個低能上司, 咁你呢~~?

黃秋生x梁祖堯《極地情聖》

今晚睇黃秋生X梁祖堯《極地情聖》，只有2個人，用流暢自然入血嘅演技說故事，有強大嘅壓場感！黃秋生一行出黎，就有種非凡嘅魅力！好charm!

故事由一個記者訪問一個獨居性格古怪嘅文學獎得主開始，由最初回避至到後來的坦承，跟住一齊討論文學，探索哲學思維，到底因為太愛而去逃避生活，又或者係想逃避生活而去愛呢？佢哋一步步將真相揭開！

2個男人說起一個女人，說到自己跟這個女人嘅關係，原來一個丈夫，一個是情人！大家都因為一段15年互相通訊嘅隱藏愛情所迷失，痛苦同遺憾！是對是錯，是甜是苦都再無定案！而最後發現女人竟然已經死去10年，多年來都是丈夫代筆，跟情人通訊。。。而丈夫也不知不覺對太太嘅情人產生咗一種奇怪感情！有時知道咗真相，亦未必係件好事！其實是真是假都唔重要，只要自己相信就可以！

由於好友睇劇時被睡魔捉住，希望上述文字能夠填補佢當中「留白位」啦！哈哈。。。

香港話劇團《蝦碌戲班 NOISES OFF》

睇香港話劇團《蝦碌戲班》嘅原因，係因為此劇屬英國鬧劇經典戲寶，而且由King Sir執導！

故事是講述一個劇團由綵排至正式演出時的前台後台多個混亂場面及失控狀態，而當中原因是由於私下的感情關係，又或是演員質素，令演出失去默契。。。說故事方法係好好，將一幕劇分別於唔同狀態及情況演咗3次，令觀眾因而看到當中的分別及引發攪笑位！

睇前真係好有期待，睇完，發覺我只係笑咗幾下，點解大部份觀眾會笑到咁誇張嘅？旁邊嘅小朋友笑得好誇，我以為睇梗兒童劇，身後嘅大朋友又笑得好誇，完全唔知佢哋嘅笑點響邊！此劇係非常正統嘅鬧劇，說對白方法，就係好傳統，好「舞台劇」腔口，有d似「呂奇」！加上背景係50/60年代嘅英國，令我更加難以投入！我可以講，說故事手法同概念真係好好，不過我真係覺得整體感覺有d out beat! 我亦有檢討點解我笑唔出，係睇得太多爆炸性演出？係我無品味？因我屬小眾口味？因我內心太複雜，唔識簡單享受？。。。Anyway, 我見大部人都睇得好開心（甚至笑得有d誇），可能真係只有我有問題，所以我依然推介！

2012「CHICAGO’ LIVE in Hong Kong」

上星期扮young,今晚就扮senior去亞洲博覽館睇「CHICAGO’ LIVE in Hong Kong」，此隊幾十年歷史嘅殿堂級組合，雖然佢哋嘅成員一直有更新，不過依然老過我好多！8個人分別成為vocal, drum, percussion, base, guitar, 3支brass, 2個 keyboard。。。表現佢哋特色嘅和唱同獨有嘅brass！Chicago 嘅飲歌當中，我最愛"Hard to say I'm Sorry", "You're the inspiration","Baby What A Big Surprise", 咁你呢？

今晩好大部份係外國人，其他就係成熟男女，可能係因為西洋show，場內有大大杯生beer賣，點解睇其他就無呢？唔通外國人真係比較飲得唔會攪事？今晚嘅觀眾情緒亦好高漲，臨完場前，超多人衝去台邊又跳又唱，氣氛唔錯！或者我都頌係未夠senior, 所以只可對Chicago抱住致敬心態，而我個心就依然都係對「草蜢」或者「胸肌型男」類嘅show有興趣多d囉！哈哈。。。

「草蜢森巴大戰軟硬FANS演唱會」

由於平日番工日子，無得先用紅酒打底，只好用正常狀態去睇「草蜢森巴大戰軟硬FANS演唱會」！原本諗優先訂飛，d位應該唔會差，點知都要做「山頂朋友」，咁鬼遠，有無攪錯呀！點知原來今次坐高d先至好，個全LED舞台真係千變萬化，好靚好勁！今次坐得近嘅，反而睇唔到個效果！

舞台皇者「草蜢」嘅演出，係好，但係可能睇得多，我已經比較習慣！反而「軟硬」嘅演出有驚喜！當中以「點解要大家red」扮唱紅歌，實質恥笑國教，笑死人！

我雖然無飲紅酒，但可以睇到natural high, 最後攪喉嚨又痛又沙！睇佢哋嘅演唱會，永遠令人有種留戀過去嘅感覺，不過情懷可依舊，但生活還是要向前去！睇完，我又要重新努力工作，為佢哋下次嘅搶錢活動儲定彈藥！

小野麗莎「World of Lisa Ono - Brazilian Serenade Asia Tour」

今晚去九展睇日本Bossa Nova女皇小野麗莎的「World of Lisa Ono - Brazilian Serenade Asia Tour」，只有一片黑幕及5個樂手，佢手拿吉他彈唱，用獨特甜美嘅歌聲，遊走佢嘅音樂世界！

Bossa Nova 係一種輕鬆，柔和及有節奏感嘅，將Jazz同森巴音樂混合，總言之係一種超級舒服嘅音樂！聽住Li種音樂，可以幻想到你著住麻質衫，腳踏人字拖，頭帶草帽，坐開篷車於海邊吹海風。。。又或者似純白cafe裡的男女對望談情。。。此種音樂只有愉快舒服的效果，令人每個毛孔都可以放鬆，所以我要特別推介給神經緊張或失眠嘅朋友聽小野麗莎嘅音！好似我今晚聽完，連頭髮都放鬆哂，好似柔軟咗呀！你都試下啦！

SHINee亞洲巡迴演唱會「SHINee World 2 Live in Hong Kong」

星期六扮young混入少女羣中去「亞洲國際博覽館Arena」睇韓國人氣組合 SHINee亞洲巡迴演唱會「SHINee World 2 Live in Hong Kong」，睇下韓流有幾勁！睇下d少女有幾瘋狂！

原來誇張到另外多開一個Hall專賣記念品，d少女全部提早到一兩個鐘，排住隊比錢買，我到嘅時候，已經mug都賣哂！勁！全部觀眾亦一早入場，準時開show，真好！我唔係好熟佢哋d歌，但係5個高大靚仔又唱又跳，舞台又有煙火、爆水池、有升高台、有高飛。。。真係好型，有時又賣cute、跟住又sell下感性，而且頌會哂肌肉。。真係連我都要尖叫~~! 而且氣氛無得頂！

而由於我係睇「standing block」，有好大面積比我周圍跳，超high，超開心！雖然睇完都分唔到邊個打邊個，不過都好enjoy！

adidas Originals「crew love party」

估唔到為咗升格做運動員，去買運動服都額外可以得到睇concert嘅機會！我今晚參加咗adidas Originals年度最大型慶典 「crew love party」！雖然亞洲國際博覽館Arena真係好鬼遠，不過人哋請你睇，都要付出下時間同車費嘅！個party 係fashion show 拼合concert, 有Eason、 黃耀明、 周柏豪、 MR、 吳雨霏、 盧凱彤、 Shine、 Rubberband、 Robynn&Kendy、 羅力威。。。。表演！Like!!

由於個show係全企位，企咗幾粒鐘，大部份人睇完都應該覺得散唒，所以無人有力叫encore！而我睇完，心中已有計劃，除咗希望來年自己可以由九流運動員升級至八流之外，決定下次一定要做好睇show準備，我要全身三間系列去搶鏡，搏出位，希望得到大會幫我影相！（當然說到底，咪又係一個中女比自己心安理得嘅shopping理由囉！）

W創作社《開關係》Open Relationship

今日睇W創作社《開關係》Open Relationship，熟悉嘅演員，支持！好靚嘅服裝形象，變化多端又大型又靚嘅場景，一讚！至於故事，有點複雜，講幾個人之間嘅多角戀，當中男男／女女／男女感情關係如何交纏，到底要點樣維持，點樣接受，點樣承受，點樣操控。。。

此劇所講嘅"計算的愛情才可長久，不安的關係才想去愛"，我幾認同。每段關係其實都需要經營，需要計算如何取悅，如何維繫。而對於一些無法控制嘅感情，大家會更想追求得到！或許現代人自我意識太強，比較自私，說到底，最愛都係自己，有時為對方所做的一切，其實都只為對方反應回饋的結果！詩人Neruda曾寫過：「愛情是一種孤獨的追求,不需讓人理解。」但實際上，有時我哋連自己都沒法理解自己！

***************
**官方介紹**

故事：如果《攣到爆》是講述如何去尋覓Mr.Right的同志關係，那麼《開關係》就是探討你在得到一段穩定感情之後所面對的轉變及危機。

梁祖堯飾演的Ken Wong認識了又南後，決定安定下來，並開始了數年的同居生活。又南卻在街上認識了聲稱從外地回來的陌生男人陳康，從未越軌的又南竟想跟陳康發生關係，但原來一切是祖的安排......。

另一方面，劉雅麗飾演又南的姊姊，她有一個比她年輕的丈夫湯駿業，兩人關係表面上十分穩定，但神秘女子韋羅莎卻介入兩人之間，終揭示了祖與又南在愛情上互相傷害的復仇計劃。

一段纏繞不清的同性戀三角關係，一段相戀多年但已進入倦怠期的姊弟戀，兩段感情的發展互相衝擊......

進念二十面體「半生緣」，

今晚睇由「進念二十面體」製作嘅「半生緣」，感覺驚喜！超好睇！

 我有睇過張愛玲原著小說文本，雖然文筆確實亮麗，但在Li個時代，確實會覺得個故事太過文藝，甚至有點老土！但「進念」重新包裝，成件事都變得有氣質同有型！

 一開始就由金燕玲用深沈嘅歌聲講故事，只係有d簡單嘅場景，一段段戲，最特別是當中用「評彈」唱說著劇情穿插，真係覺得好古典好有味道，但又好有型，而金燕玲繼續唱英文歌在劇中穿插，好有feel！全劇以普通話演出，部分角色需以上海話來說對白，令你更能投入那個年代！

 用咗新嘅方法去說故事，但又忠於原著，真係好唔簡單！總言之，此劇真係好好睇！暫時黎講，我覺得算係本年度最好睇嘅舞台劇！有睇過原著或無睇過嘅人，都可以滿意！我全力推介！

小劇場《My First Time 失身1234》

睇咗一個小劇場《My First Time 失身1234》
 
我睇咗介紹, 本來對此翻譯劇有D期待, 可惜出來太多太短嘅情況混雜一齊, 感覺好亂, 而好多處境都屬於外國嘢, 更加無MUG可以感受或共鳴, 又無高潮位, 所以我對此劇有D失望….

反而最意想不到嘅係文化中心外嘅海景, 睇咗有D感動, 可能天氣好清, 覺得香港夜境真係靚到不得了!! 希望低能政府唔好再攪D害細路嘅洗腦工程, 同唔好白痴到亂放400百萬深圳無户藉同胞黎香港, 唔好攪亂一個咁靚嘅地方啦!!

Theatre Noir「Disney's Mulan Junior」

由160個小孩、少男少女演出嘅「Disney's Mulan Junior」英語音樂劇，每個人都唱得好演得好跳得好，只係用咗2星期朝9晚6去學去練，出黎嘅效果好PRO，無論係main casts 定係side casts，個個都好努力，好有passion，真係好唔簡單！真係好好睇呀！激like!

雲門舞集舞劇「九歌」

有幸睇到「雲門舞集」準備跨2年世界重演嘅舞劇「九歌」第一場，此劇已有20年歷史，今次重新製作及以新生代舞者演出！

將舞台變成了水汪汪的新鮮荷花池，用亞洲民族的音樂，襯托住舞者美妙嘅肢體語言，一切都跟舞姿交融著。。。最後一幕，舞者點亮咗幾百盞油燈，將舞台變成星河，好唔簡單！

雖然我對於屈原嘅「九歌」原作不大清楚，但可以感受到佢嘅氣度同詩意！而全劇每個畫面都似一幅幅畫！燈光一流，舞者每條肌肉輪廓都可以清楚睇到！...

亦參加咗香港唯一一場「演後談」，林懷民細說創作點滴，很有意思！而提問嘅觀眾，都係做足功課，高質數！

香港話劇團《我和春天有個約會》

《我和春天有個約會》係本土經典劇作，我睇過電影版N次，睇一次喊一次！相隔廿載，今晚睇咗故事延續篇《我和秋有個約會》，劇情背景轉到現代，講鳳萍嘅仔，在音樂上有才華，但卻因一段逝去的愛情而意志消沉，忽略咗身邊所有關心他的親人和朋友。原來當中埋藏著一份悲傷的感情。。。而感動位係一個失去太太同女兒嘅男人，悠然地講嘅說話＂我哋要學識面對遺憾。。。回憶到底係痛苦定開心，只取決於你嘅取捨，所以我只會記住開心嘅嘢。。。Living in now and here!"

張敬軒演出同演唱都好好，靚仔咗又成熟咗！而劉雅麗、羅冠蘭、蘇玉華與馮蔚衡，廿年后再次演繹四大台柱，但只有一小段，感覺很浪費，很可惜，又很珍惜，到底幾時會同台見到佢哋呢？睇完此劇，更恨睇番《我和春天有個約會》！！

譚詠麟 x 杜麗莎 “Time After Time演唱會2012"

我從來都唔係譚詠麟嘅FANS (因我係鍾意張國榮架!), 更莫講係杜麗莎啦, 一直都無諗住睇佢哋嘅CONCERT, 不過聽完佢哋電台節目嘅現場演繹, 又覺得幾吸引, 所以都去睇咗 “譚詠麟 杜麗莎Time After Time演唱會2012”!

雖然佢哋好似講多過唱(可能因為唔夠氣), 不過真係唱得好好, 特別係所挑選嘅英文歌, 首首好聽, 詞簡意濃, LIKE!! 最攪笑係高潮位放在11:15, 但跟住就會即時幫你降溫講BYE-BYE, 真係有D無所適從, 哈哈….

Anyway, 身為80前嘅我, 可以跟住唱95%嘅金曲 “…. kill me softly with his word….. you are wonderful tonight….. I honestly lone you……全世界我也可以放棄, 至少還有你………”

回憶感覺真好~~!

三角關係「快樂無罪-慶回歸」

今晚去藝術中心睇「快樂無罪-慶回歸」，門外已經擺放2米高水碼同三層鐵碼，為領導人來臨做準備，感覺暫時平靜。。。
「快樂無罪」係一年一度紀錄香港大事人情嘅小劇場，十年十個show真係唔簡單！今晚一班有情懷嘅「80前」，用一d Low End方法演繹一場15年城市回憶，努力重溫10年黎嘅爆笑精華，令一眾同樣儍嘅「80前」觀眾如我興奮不已，對住3個頂住大肚皮嘅中佬揮住閃閃燈泡狂呼encore! 我叫到喉嚨痛！
開心！係因為睇咗一場好show！回味！
可惜！係「快樂無罪」系列要完結了！不捨!
痛心！係因為愛香港！無奈！

演奏會「莫札特的管樂小夜曲」

今日趕飛返港睇「莫札特的管樂小夜曲」，一個由Oboe, Bassoon, Clarinet, Basset Horn。。。幾種管樂演奏嘅Chamber Music Concert! 各種唔同質感，唔同tone嘅管樂好似響度「對唱」緊，好好聽！室樂嘅好處就係可以好清楚聽到每種樂器嘅聲音同「對答」！今晚有特別安排，每個樂章之間有段小戲劇去講下Mozart嘅一點小故事，希望令聽眾覺得有趣！無論效果如何，亦算係good try! Anyway, 大家真係需要継續支持古典音樂！

W創作社音樂喜劇「紅海人。藍海戰」

星期六又倦又趕咁飛番香港去睇叫自己做「工具舞台劇」嘅「紅海人。藍海戰」音樂喜劇，用嘅概念算幾新，話比你知mug嘢係經濟學上嘅紅海、藍海、value innovation。。。當然，最吸引我嘅牌頭，係白只嘅演技同林二汶嘅歌聲。。。雖然此劇應夠娛樂性（因為同行朋友今次好似無瞓），但係我始終覺得唔夠張力同較表面化，不過都我過咗一個開心嘅夜晚！

PS: 最唔鍾意同場有d觀眾，係又笑唔係又笑，有時做觀眾都要啱Beat架！唔該！

中英劇團「象人」

今晚去葵青劇院睇中英劇團嘅「象人」，一套傳統翻譯正劇，由鍾景輝導演，盧智燊主演。無誇張激情，無大癲大廢。。。當然唔係輕鬆寫意嘅作品，但唔以永遠都只係睇流行劇目，傳統正劇亦需繼續支持！

**********
「象人」簡介：19世紀，頭部畸型的象人約翰梅里克從小被父母拋棄，被馬戲團團主收容，成為娛樂大眾的怪物，約翰在馬戲團中受盡不人道的待遇，也未得到良好的醫療照護。直到遇上一名英國外科權威崔佛士醫生將他收留在醫院裡並給予妥善的照顧。在崔佛士醫生的悉心照護下，讓他感受到從未體驗過的關懷，也讓他體驗到人間的溫暖，使得之前只能帶著面具示人的約翰，重新找回作為一個「人」的尊嚴……

三角關係「如果，你愛我。City of Love」

今日好彩飛機無delay，我一放低行李就趕下場，睇「如果，你愛我。City of Love」！一套由年青演員做嘅舞台劇，concept係講城市可能變得越黎越陌生，人與人之間嘅感情越黎越保留。。。一段段小場口交叉表達。。。concept係好，係有d嘢想講，但劇本有d散，未夠入肉難有共鳴！不過都要繼續支持有熱誠有理想嘅劇團！而無論我哋嘅城市變成點，我哋都要去愛佢，如果連自己人都唔再愛，頌有邊個會愛呢？

「達明一派兜兜轉轉演演唱唱會」

今晚睇「達明一派兜兜轉轉演演唱唱會」，聽住佢哋八九十年代嘅歌，依然唔覺得out! 又忽然回憶到以前讀書去ball跳舞嘅境象！繼續充滿歐陸色彩嘅電子音樂，充滿地道文化及時代變幻嘅歌詞，明哥妖豔嘅演繹，再加上「人山人海」到家嘅光影幻象配合嘅舞台，完全無dancer，但係好睇！
當然，有我最鍾意嘅劉以達彈結單！同場加影我哋好友嘅「die hard fans」瞓住睇（或者睇住瞓），今夜更覺精彩！

閻奕格 Janice Yan 音樂會 "我回來了"

好友「型男」非常迷戀閻奕格，所以今晚拖住佢嘅「索女」再捉住我，一齊去睇Li個 up and coming 嘅歌手！

 閻奕格真係好唱得，外形夠靚，有氣質，有學識，當然最後可以有幾紅，就要睇下佢有無運！
 
「型男」今晚已入咗歌迷會，而且想爭做會長添！我都希望佢得，咁我哋以後唔駛擔心買唔到飛啦！

香港話劇團「金池塘」4th Run

今午睇經典舞台劇「金池塘」4th Run，一套淡淡地講愛嘅故事！鍾景煇飾演一個永遠用挖苦態度寸爆嘅老人家，演技出色，節奏好，咁大年紀，要記咁多對白，真係唔簡單！而李司祺嘅演技已入血，超自然，超舒服！當然，舞台劇版與電影版嘅重點不一樣，不過都係講如何欣賞，如何表達，如何去愛。。。雖然沒有激情，但係有時淡淡嘅情，更加可以長久同舒服！

香港話劇團「心洞」

趕飛返港睇香港話劇團「心洞」，講兩夫婦失去兒子後，生活在矛盾、悲痛、思緒混亂之中，如何面對，如何繼續生活。。。當中兩場鬧交戲，唔知點解我會睇到眼濕濕。。。劇情講及嘅喪親之痛，我都曾經經歷過，真係好難面對，當時唔想其他人題及，唔想接受，就算時間過咗幾耐，每當想起，都依然會有哀傷感。。。實際上，我哋要去學習與哀傷共存，但唔係沈溺，要從傷痛中釋懷，要繼續好好生活，要更加珍惜眼前嘅一切！

「黃凱芹TrueColors 25週年演唱會」

今朝無得一人一票，今晚就可以一人一票睇「黃凱芹TrueColors 25週年演唱會」，身在最無奈嘅時代，回顧香港最美好嘅年代！

 有永遠嘅白馬皇子與公主(周慧敏），絕配！有一段父子情，再加幾十個跟隨25年嘅中年fans伴唱，都令我感動到有d眼濕濕！而encore位竟然出現亞Lam，真係型到爆！
黃凱芹真係好靚仔，有材華又唱得，點解當年無大紅呢？或者就係性格決定命運！咁我哋呢？香港人可唔可以做好d，試下改變自己嘅命運呢？

中英劇團「談談情，跳跳橋」

今晚好急趕又捱餓去睇用輕鬆手法安排嘅翻譯劇「談談情，跳跳橋」，我好鍾意彭秀慧所寫嘅說話：「愛沒有標準，不容量度，不許猜疑。劇外於我所我所說的是一份初衷，一種衝動；當中沒有計算，沒有退縮。愛如人生，任你說得冠冕堂皇，不過紙上談兵；不管如何，勇往直前吧。」

 無論所擁有嘅係實還是虛，就算是夜有點饑寒交迫，我都覺得心中有充滿愛！

舞台劇「All in the Timing 就在那個時候的那個時候」

今晚負傷去睇「All in the Timing 就在那個時候的那個時候」尾場，原本睇宣傳照，以為係有關時間錯摸嘅感情關係，原來係一段段小故仔，一半屬於翻譯劇本，一半屬本地創作，大部分都好有趣！我最鍾意以下幾段：

 第一幕由2個人不斷對演住類似「人生交叉點」每幾十秒甚至幾秒一小節無break嘅表達，當中嘅順暢，熟練，節奏，力量。。。好利害！當然，當中所編譯嘅深層意義也不少！
 
第二幕講3個老人院亞伯，係全晚最愛及高潮所在！全由女演員扮演嘅亞伯色音與形體動作都好！當然最利害係個劇本，超攪笑！好喜歡「黃呈欣」嘅演出！
 
第五幕由「胡麗英」自編自演，佢扮嘅亞伯就賤賤格格，好抵死！橋段亦好攪笑！

Anyway, 比預其中好睇好笑！滿意！開心！:)

舞台劇「房間裏的女人」

唔知點解近期嘅舞台劇差唔多全部都係Li個禮拜尾演出，結果我有2套睇唔到！:(

今午睇「房間裏的女人」尾場，講述一個妓女與神嘅關係，讓人反思宗教嘅意義，可能我無宗教信仰，對我唔會有太大衝擊。此劇本係一個青年編劇寫作優勝作品，我哋點都要支持下！希望快d出多個莊岩梅啦！
 
我第一次去JCCAC睇劇，感覺好舒服，其實得閑去Li個centre睇下展覽，輕輕鬆鬆歎番個下午茶，扮下文藝青年，幾好架！

香港藝術節舞台劇「示範單位 SHOW FLAT」

周六下午同一眾靚人去睇舞台劇「示範單位」，對於熟悉嘅張錦程、陳淑儀及邵美君嘅演出，絕對放心亦滿意！如果此劇可以由始至終超現實誇張手法可能更好，點解要臨尾想「有d嘢講」呢？只係得兩個鐘，何必無端端想正經一下講「家vs示範單位」嘅分別呢？

 此劇有好多粗口對白，反影人物角色，對答如流，竟然覺得佢哋講得好好聽，算唔算本地文化呢？不過應該係因為d演員演譯得好！不過好多人頂唔順d粗口，要提早離場！
Anyway，雖然睇完無mug嘢帶走，但心情愉快！

舞台劇「野豬」

今晚睇咗一套好多反思好沈重嘅舞台劇「野豬」，莊梅岩又用細膩筆觸寫咗一個講述已經失落的現代都市寓言，帶領觀眾走進都市人的內心世界！講及到底公平／自由重要，又或者生活／安穩重要？邊d人操控言論同知情權？到底尋找真相是好是壞？自我審查／妥協就一定唔好？。。。好多好複雜嘅反思題目，特別尾段，令我到此刻依然透唔到氣！好勁嘅劇本，我強嘅演員！