杜德偉「My Virtual Planet Tour」演唱會

成個禮拜loop住「杜德偉~最愛17首」，為咗入場睇佢嘅「My Virtual Planet Tour」演唱會。佢係我少年時代喜愛歌手，難得50幾歲人頌可以有咁嘅樣，咁嘅body，又咁跳得。。。一直唔明點解佢當時唔可以大紅大紫，或者佢係生不逢時，佢好「soul」嘅西洋歌曲風到近年香港先開始流行，所以會替佢不值。。。
今晚主要以快歌為主，可惜音響效果真係有d出事，聲音好「拆」，攪到我好難投入，好想投訴呀! 其實杜德偉有好多好好聽嘅慢歌都無唱，好彩此刻DJ咁啱用一個鐘時間將佢無唱到嘅都播番哂，都叫做幫我補番欠缺咗嘅一份回憶，一份情懷。。。唔知點解會聽到收音機播「准我再一次」，會突然有d心痛同想喊嘅感覺。。。

林海峰 + 葛民輝《笑の大学》

終於睇咗一票難求嘅《笑の大学》，最大賣點係由「林海峰 + 葛民輝」演出，絕對係唔知佢哋會做mug都要買飛嘅組合。搵佢哋2個做係相當聰明嘅做法（當然佢哋又肯做至得），否則真係幾難引人入場。此劇就只有佢哋2個做對手，對白相當熟練，表情亦鬼馬。 雖然此劇好出名，每個國家都會用好勁嘅演員去做，日本有「役所廣司」，大陸就有「陳道明」。。。我承認演出嘅演員能力係要有番咁上下，但始終故事時代太久遠，場景係1940年嘅日本，頌要用日文腔口同形態講廣東話對白（扮講梗日文），硬係覺得怪怪哋。Anyway, 作為weekend嘅節目又有得同朋友聚下，依然又開心又enjoy!

***************

**官方介紹**

一個愛笑面，認為笑在生命中很重要；一個愛板面，一生從未由心底真正笑過。

昭和15年（公元1940年），日本正處於軍國主義盛行的年代，劇本在上演前要經過嚴格的審核。喜劇作家椿一（葛民輝飾演）為了新劇《茱麗葉與羅密歐》能如期上演，向嚴苛的審查官向坂睦男（林海峰飾演）提出申請。向坂認為應該把劇本中的喜劇部份全數刪除，命椿一加入「哈姆雷特」為父報仇的熱血橋段來激勵國民。椿一為了通過審查，不得不改寫劇本，同時他又在思考如何放入新的笑料，惹來向坂更多層出不窮的無理要求！茱麗葉愛上了哈姆雷特，連天皇也出現在劇本裡面。

在兩人的拉鋸過程中，椿一憑著信念與堅持，寫出前所未有的惹笑之作。究竟劇本最後能否通過批核？舞台劇又能否如期上演？在黑暗侷促的審查室，見證最燦爛的人性光輝。《笑の大学》情節峰迴路轉，引發笑聲不斷！

舞台劇《杜老誌》

今晚睇星級陣容的舞台劇 《杜老誌》 ，"据說"投資千萬元製作(雖然我覺得咁講有d誇大咗)，幕前有影后劉嘉玲配兩位影帝梁家輝及謝君豪，幕後則有張叔平做美指、亦由我最喜愛的莊梅岩做編劇，毛俊輝做導演。。。全劇牌面超勁，真係唔睇唔得!

謝君豪演富商，實際以騙子手法起家，佢今晚用咗「杜汶澤」式演繹，我睇咗一段時間先知係佢。而梁家輝則是銀行家，成晚喉沙沙，感覺一般。劉嘉玲就演為保亡夫遺產而不惜一切的廠家遺孀，d衫好靚，佢好fit，聲音演繹都做得恰如其份，而其他女角嘅旗袍都好鬼靚，攪到我都心思思想著番件!

原本係對70年代的著名交際舞台「杜老誌」那種聲色犬馬場口有點期待，但最終覺得唔多夠grand! 而故事就似因為時間問題不能再深入d。。。。Anyway, 此劇應該吸引好多平時唔會睇捧場，未嘗唔係好事，但日後只要係好嘅劇目，無論大小，都希望多d人會入場欣賞啦！

W創作社《修羅場》

琴日竟然用咗8個鐘先至可以由上海飛返香港，攪到要拖住2夾行李去劇場睇舞台劇《修羅場》，真係完全顯示咗我嘅睇劇誠意!

我對此等職場題目，一直都比較有興趣，好希望學到D新概念，但此劇只屬輕度級，事件發生在一個簡單嘅機構，真係無“血淋淋”嘅鬥爭，感覺未夠深入，未夠惡“毒”。當然，此劇都反映咗職場內，每個人都有自己嘅角式同處境，大部份人可能未必有什麼理想或要令自己做到最叻，或許只想安安全全咁留得耐D。。。。。Well, 我到今時今日都頌梗學乖，希望都可以在職場安然無恙留到最後啦。。。。。 咁你呢? 

 ****************************
**官方簡介**
兩大劇帝梁祖堯 X 潘燦良挑戰香港職場文化...
工作的鬥爭裡，你只得兩個結果：「完敗」或「慘勝」！
發生在學校內的辦公室政治，你會睇到我們的將來。W創作社主辦的舞台劇《修羅場》，兩大劇帝梁祖堯及潘燦良演繹「完敗」或「慘勝」的辦公室政治！其他主要演員包括邵美君、湯駿業、白只、鄧世昌及許晉邦，由黃智龍編劇及導演，司徒慧焯擔任創作總監，何秉舜擔任音樂總監及現場演奏。

《修羅場》將殘酷的職場鬥爭，透過戲劇張力，血淋淋展現在觀眾跟前！為了在職場上生存，用你的自由去換來成熟？然後變成一個除了目標、甚麼都沒有的「人」，這是唯一的選擇嗎？《修羅場》由黃智龍編導、司徒慧焯擔任創作總監，由兩大香港舞台劇獎「最佳男主角」梁祖堯及潘燦良聯合領銜主演。

演唱會「福山雅治 WE'RE BROS. TOUR」

日本人開演唱會果真嚴謹，睇「福山雅治 WE'RE BROS. TOUR」，帶位員要帶白手套，入場每人分發wifi燈捧，開場前先播有趣片段介紹如何使用燈捧及各項需注意事項。。。原來燈捧係大會控制，會閃，會暗，會變色，變化多端，完全配合個show，型! 而整個show嘅各項燈光，音樂，演出及vedio場境安排絕對完美，勁!

一般人可能只從電視劇認識「福山(Masha)」，但佢實際係唱歌出身，頌要係唱作型，頌要彈得一手好結他，台上又唱又彈，真係型到爆! 日本已經再無其他又man，又靚仔，又叻嘅明星，佢可能係最後一個!

成個show給人窩心及好有誠意嘅感覺，而fans club更自支印製「多謝banner」比在場每個觀眾於完場前高舉比Masha睇，見到佢都深受感動。Anyway, 睇完個show，係會令人更加愛佢! 。。ましや， ありがとう !

草蜢演唱會「我要跳舞，唔跳會老。。。」

「我要跳舞，唔跳會老。。。」今晚又同草蜢有個約會，佢哋繼續妖，繼續閃，繼續型。。。快歌加上招牌舞步依然無得頂，最驚喜係Alex To 作為guest，開心! 我要跳舞，唔跳會老。。。別說我不行!

音樂會「The King's Singers x CCOHK」

由美麗sunset伴住去睇「The King's Singers x CCOHK」，用古典加少少Jazz去聲演故事，後半場6個英國紳士唱「a cappella」，又靚仔（似未禿頭前嘅Prince William），又cute又唱得好。香港係佢哋world tour第十一站，佢哋竟然特別為我哋編唱「上海灘」做encore，令全部觀眾驚喜，令人愛上佢哋! 第一次睇classical會有3次encore，見到表演者自己都好enjoy，佢哋真係「功力精湛，娛樂性豐富」，今晚大滿足! Let's Misbehave! Happy Weekend!