音樂會「The King's Singers x CCOHK」

由美麗sunset伴住去睇「The King's Singers x CCOHK」，用古典加少少Jazz去聲演故事，後半場6個英國紳士唱「a cappella」，又靚仔（似未禿頭前嘅Prince William），又cute又唱得好。香港係佢哋world tour第十一站，佢哋竟然特別為我哋編唱「上海灘」做encore，令全部觀眾驚喜，令人愛上佢哋! 第一次睇classical會有3次encore，見到表演者自己都好enjoy，佢哋真係「功力精湛，娛樂性豐富」，今晚大滿足! Let's Misbehave! Happy Weekend!

三角關係舞台劇「他有喜事 YES, I DO」

母親節如常一家人開開心心食晚飯慶祝，但今午帶咗一老兩嫩去睇攪笑舞台劇「他有喜事」作為母親節特備節目，內容環繞男人由求婚成功開始到婚宴前所面對嘅困難同問題，一切男男女女老老少少嘅角色都只係由3個中佬演繹，而完場頌有橙派，非常攪笑!

另外，由於我亞媽係全場最靚嘅母親，演員特別送出一份禮物比佢，更加開心! Happy Mother's Day~!

黃秋生 x張敬軒 舞台劇「EQUUS」

周末睇著名劇作「EQUUS」一 黃秋生從容講出每段冗長複雜嘅對白， 繼續散發其戲劇皇者嘅壓台感，勁！張敬軒亦做到那份竭斯底里，會擔心佢演完後會否可以抽離角式! 而以現代舞方法演繹「馬」嘅演員，個個身材完美讓人心動，真係睇到嘩嘩聲! 每個動作都優美神似，看似柔柔嘅動作，但實際應該每一下都費盡陰力，讚！

故事講嘅「信仰」可能太過「不正常」，但現實中我哋每個人都有自己的「信仰」，唔一定大如宗教，有時只係堅信某種生活習慣，亦已變成自身嘅一種「信仰」。每當我哋對「信仰」有異想或開始動搖，就會嘗試為自己找唔同嘅借口！ 但有時又真係要好似劇中主角一樣，要將那種「自身信仰」完全毀滅，方能得到最終的開脫!

************************...
EQUUS故事大綱
17歲的Alan一夜間刺瞎了馬廄裡的六匹馬，造成轟動社會的異聞，他的父母找來心理醫生Martin為他治療，Martin與Alan多次會面，逐步揭露Alan的往事，亦瞭解到Alan的個性及家庭狀況。雖然Alan是刺瞎六匹馬的「兇手」，但Martin發現他極端愛馬，愛到崇拜的地步，把馬視作神衹。

然而，在治療的過程中，Martin漸漸陷入一種迷思，年輕的Alan看似「瘋狂」，但Martin看到了Alan對馬的情感是何等洶湧澎湃，而這等熱情正正失落於社會。不論是Martin或是Alan的父母，這些在社會意義上都是「成熟」、「正常」的人，但又是否有血有肉？相較於他們判斷年輕的Alan，這種年少的「瘋狂」和他們那「成熟」的「正常」，哪一種又較合乎人性？

Broadway Musical “NUNSENSE”《喜靈州……分享夜》

假期去咗捧我跳舞老師場，睇由佢有份主演嘅Broadway Musical “NUNSENSE”《喜靈州……分享夜》，此劇將場境改為60年代嘅香港，5個“修女”依然攪笑，又唱得又跳得。佢哋多重唱真係好好聽，而當中最喜歡“吳修女”一人分演兩角嘅高低音對唱，唱功真係好勁，而我老師”羅修女”嘅演出亦無得頂。此劇好適合小朋友及年青人睇，同行2個美少女及同場嘅小朋友都睇得好開心!

真係覺得有D可惜係此劇宣傳似乎唔多夠，就連我成日睇劇嘅人都唔多知，真係有D浪費，希望以後可以有多D宣傳，令多D人可以睇到好嘅演出啦!!

**********************************
**劇情介紹**
喜靈州心慈聖母瑪利亞獻主會(離島分會)的院長及四位修女前往另一修院交流回來，驚訝地發現修院內修女於進餐時集體中毒死亡──簡直是「最後的晚餐」現代版！為了將她們運回老家安葬，院長率領四位各俱天分的修女，硬著頭皮進行一場夾雜歌唱、舞蹈、互動問答、棟篤笑的天才大雜會表演，籌募善終經費，是為《喜靈州心慈聖母瑪利亞獻主會(離島分會)修女突然集體魂歸天國籌募善終經費慈善歌舞暨堅守信仰分享夜》，簡稱《喜靈州……分享夜》。

當奴@903「當奴歡樂阿家藐咀騷」

由於我亞媽同我都係903Fans, 所以今次佢主動買飛請我去新光睇「當奴歡樂阿家藐咀騷」，亞媽肯定係全場最老觀眾，而佢亦睇得好開心。最尾Donald用真身講自己同老婆嘅感情，我被感覺到眼濕濕。總括而言，個show幾好笑，喜歡認真努力嘅人，會繼續支持! Good Show!

韓劇「來自星星的你」

「來自星星的你」實在令人中毒，不能自拔，坐立不安，日日等下一集。。。片尾的雪地篇，加上考琳首歌「再見」，真係羅曼到不能! 或者以現實角度，最令人羨慕係女主角keep到嘅身形同氣質，當然另加大量靚衫!!

軟硬25周年 Softhard heHA opera

 

我於少女時代，無聽過任何“軟硬”所做嘅電台節目，反而近年每日都有聽佢哋做“正經”節目，或者大家都出生於相同年代，對佢哋感覺好親切! 睇咗“軟硬25周年 Softhard heHA opera”，一齊於白藍地磚舞台(唔知點解以前個個屋企都係li隻地磚)，同佢哋同遊細路仔嘅生活，中學的懷春時期，跟住就係出黎做嘢時嘅虛歉生涯。。。。我唔係佢哋嘅fans，亦唔覺得佢哋有好歌藝，但係就好鍾意佢哋比咗我嘅一份昔日情懷! 而當中嘅笑位（特別係「新光白虎」），雖然我唔可以具體記得細節，但我就真係睇完笑到喉嚨痛!

同佢哋一樣，我哋到咗li個年紀，會更加懷念以前嘅時光，亦會對今天嘅世情多咗一份無奈感，“軟硬”於表演後段亦已好好為我表達咗li份感覺。。。。

噢，突然好掛住以前嘅自己，好掛住美好的80/90年代!